Relatorio en el CiTiUS: «Novas tecnoloxías e economía: retos para os traballadores, xestores, investidores e gobernos»

Seth Benzell, investigador posdoutoral asociado ao prestixioso centro de investigación Masssachusets Institute of Technology (MIT), dará unha conferencia no CiTIUS o próximo 14 de decembro na que abordará os cambios previstos sobre as forzas de traballo e a sociedade en xeral como consecuencia da automatización da economía e a transformación dixital, así como os seus efectos e os retos asociados á consolidación das novas tecnoloxías, como a Intelixencia Artificial.

Malia que poucas profesións son polo de agora totalmente automatizables, cando menos un 30% das actividades desempeñadas actualmente no 60 % dos traballos si o son. No caso concreto de España, preto da metade das horas laborables poderíanse automatizar, segundo un informe a consultora McKinsey. A tendencia actual apunta a que os seres humanos somos cada vez máis prescindibles, e os seus traballos poderían ser tecnicamente sustituibles por máquinas intelixentes, dotadas da capacidade de aprender por si mesmas. Perante estas cifras, aparentemente pouco halagüeñas, xorden voces que acusan á dixitalización da economía de ser unha eiva para os traballadores, cuxos empregos poderían verse ameazados de non adaptaren os seus coñecementos e habilidades ao novo escenario económico e social; pola contra, outras ven nesta transformación unha oportunidade para crear un novo paradigma, no que Intelixencia artificial e Automatización contribuirían a crear unha sociedade máis xusta, onde as persoas e as máquinas traballen en equipo acometendo as tarefas que cada grupo poida realizar de forma máis eficiente.

Co obxectivo de alumear e estimular o debate ao redor da Intelixencia Artificial, o investigador do Massachusetts Institute of Technology (MIT) Seth Benzell impartirá o vindeiro venres 14 de decembro no salón de actos do CiTIUS a conferencia ‘New technologies and the economy: challenges for workers, managers, investors, and governments’ (Novas tecnoloxías e economía: retos para os traballadores, xestores, investidores e gobernos). Nun contexto no que novas tecnoloxías como a robótica, a aprendizaxe automática ou o comercio dixital teñen modificado a concepción tradicional do traballo, a remuneración dos traballadores, e os beneficios que perciben empresas e investidores, Benzell falará sobre a natureza destas novas tecnoloxías, así como das actuais liñas de investigación sobre o novo rumbo que está a tomar a economía para analizar as súas posibles consecuencias e solucións.

Sobre Seth Benzell

Doutor en economía pola Universidade de Boston, Benzell estuda as relacións entre a automatización da economía, a dixitalización e as redes. Interésalle a política fiscal e a macroeconomía en xeral, e na actualidade investiga o xeito no que determinados avances tecnolóxicos (especialmente a Intelixencia Artificial), propáganse e dirixen a economía, ademais de predicir o seu impacto no mercado, os salarios e o benestar global.